Centuria VII, 11-20

VII,11
L’enfant Royal contemnera la mere
Oeil, piedz blessés, rude, inobeissant,
Nouvelle à dame estrange & bien amere,
Seront tués des siens plus de cinq cens.
VII,12
Le grand puisné fera fin de la guerre,
Aux dieux assemble les excusés :
Cahors, Moissac iront long de la serve,
Reffus Lestore , les Agenois razés.
VII,13
De la cité marine & tributaire
La teste raze prendra la satrapie:
Chasser sordide qui puis sera contraire
Par quatorze ans tiendra la tyrannie.
VII,14
Faux esposer viendra topographie
Seront les cruches des monuments ouvertes
Palluler secte saincte philosophie
Pour blanches, noir, & pour antiques veres
VII,15
Devant cité de l’Insubre contree,
Sept ans sera le siege devant mis:
Le tres grand Roi y fera son entree
Cité puis libre hors de ses ennemis
VII,16
Entreé profonde par la grand Roine faicte
Rendra le lieu puissant inacessible
L’armee des trois lions sera deffaite,
Faisant dedans cas hideux & terrible
VII,17
Le prince rare de pitié & clemence,
Viendra changer par mort grand cognoissance:
Par grand repos le regne travaillé,
Lors que le grand tost sera estrillé.
VII,18
Les assiegés couloureront leur paches,
Sept jours apres feront cruelle issue
Dans repoulsés feu, sang. Sept mis à l’hache
Dame captive qu’auvoit la paix tissue.
VII,19
Le fort Nicene ne sera combatu,
Vaincu sera par rutilant metal
Son faict sera un long temps debatu,
Aux citadins estrange espouvantal.
VII,20
Ambassadeurs de la Toscane langue,
Avil & Mai Alpes & mer passer:
Celui de veau exposera l’harangue,
Vie Gauloise ne venant effacer.