Centuria V, 41-50

V,41
Nay souz les umbres & journée nocturne
Sera en regne & bonté souveraine:
Fera renaistre son sang de l’antique urne,
Renouvellant siecle d’or pour l’aerin.
V,42
Mars esleue en son plus haut befroi,
Fera retraire les Allobrox de France:
La gent Lombarde fera si grand affroi,
A ceux de l’aigle comprins souz la balance.
V,43
La grande ruine des sacrez ne s’esloigne,
Provence, Naples, Sicille, Seez & Ponce:
En Germanie, au Rhin & la Cologne,
Vexez à mort par ceux de Magonce.
V,44
Par mer le rouge sera prins de pirates,
La paix sera par son moyen troublee:
L’ire & l’avare commettra par fainct acte
Au grand Pontife sera l’armee doublee.
V,45
Le grand Empire sera tost desolé
Et translaté pres d’arduenne silve:
Les deux bastardz par l’aisné decollé,
Et regnera Aenodarb, nez de milve.
V,46
Par chapeaux rouges querelles & nouveaux scismes
Quand on aura esleu le Sabinois:
On produira contre lui grans sophismes,
Et sera Rome lesee par Albanois.
V,47
Le grand Arabe marchera bien avant,
Trahi sera par les Bisantinois:
L’antique Rodes lui viendra au devant,
Et plus grand mal par autre Pannonois.
V,48
Apres la grand affliction du sceptre,
Deux ennemis par eux seront defaictz:
Classe d’Afrique aux Pannons viendra naistre,
Par mer & terre seront horribles faictz.
V,49
Nul de l’Espaigne mais de l’antique France
Ne sera esleu pour le tremblant nacelle,
A l’ennemi sera faicte fiance,
Qui dans son regne sera peste cruelle.
V,50
L’an que deux freres du lys seront en aage,
L’un d’eux tiendra la grand la Romanie:
Trembler les monts, ouvert Latin passage
Pache macher, contre fort d’Armenie.