Centuria VI, 21-30

VI,21
Quant ceux du polle artiq unis ensemble,
En Orient grand effrayeur & crainte.
Esleu nouveau, soustenu le grand tremble,
Rhodes, Bisance de sang Barbare taincte.
VI,22
Dedans la terre du grand temple celique,
Nepveu à Londres par paix faincte meutri:
La barque alors deviendra scismatique,
Liberte faincte sera au corn & cri.
VI,23
D’esprit de regne munismes descriées,
Et seront peuples esmuez contre leur Roi:
Paix, faict nouveau, sainctes loix empirées,
Rapis onc fut en si tres dur arroi.
VI,24
Mars & le sceptre se trouvera conjoinct,
Dessoubz Cancer calamiteuse guerre:
Un peu apres sera nouveau Roi oingt,
Qui par long temps pacifiera la terre.
VI,25
Par Mars contraire sera la monarchie,
Du grand pecheur en trouble ruineux:
Jeune noir rouge prendra la hierarchie,
Les proditeurs iront jour bruineux.
VI,26
Quatre ans le siege quelque bien peu tiendra,
Un surviendra libidineux de vie:
Ravenne & Pise, Veronne soustiendront,
Pour eslever la croix de Pape envie.
VI,27
Dedans les isles de cinq fleuves à un,
Par le croissant du grand Chyren Selin:
Par les bruines de l’aer fureur de l’un,
Six eschapés, cachés fardeaux de lin.
VI,28
Le grand Celtique entrera dedans Rome,
Menant amas d’exilés & bannis:
Le grand pasteur mettra à mort tout homme,
Qui pour le coq estoient aux Alpes unis.
VI,29
La veuve saincte estendant les nouvelles,
De ses rameaux mis en perplex & trouble:
Qui sera duict appaiser les querelles,
Par son pourchas des razes fera comble.
VI,30
Par l’apparence de faincte saincteté,
Sera trahi aux ennemis le siege:
Nuict qu’on cuidoit dormir en seureté,
Pres de Braban marcheront ceux du Liege.