Centuria IV, 41-50

IV,41
Gymnique sexe captive par hostage,
Viendra de nit custodes deceveoir:
Le chef du camp deçeu par son langage:
Lairra à la gente, sera piteux à voir.
IV,42
Geneve & Langres par ceux de Chartres & Dole,
Et par Grenoble captif au Montlimard:
Seyssett, Losanne par fraudulente dole
Les trahiront par or soixante marc.
IV,43
Seront ouis au ciel des armes battre:
Celui an mesme les divins ennemis:
Voudrant loix sainctes injustement debatre,
Par foudre & guerre bien croyans à mort mis.
IV,44
Deux gros de Mende, de Roudés & Milhau,
Cahours, Limoges, Castres malo sepmano
De nuech l’intrado de Bourdeaux un cailhau,
Par Perigort au toc de la campano.
IV,45
Par conflit Roi, regne abandonnera,
Le plus grand chef failira au besoing:
Mors profligés peu en rechapera,
Tous destranchés un en sera tesmoing.
IV,46
Bien defendu le faict par excellence,
Garde toy Tours de ta proche ruine:
Londres & Nantes par Reims fera defense
Ne passe outre au temps de la bruine.
IV,47
Le noir farouche quand aura essayé
Sa main sanguine par feu, fer, arcs tendus:
Trestout le peuple sera tant effrayé,
Voir les plus grans par col & pieds pendus.
IV,48
Planure Ausonne fertile, spacieuse,
Produira taons si tant de sauterelles:
Clarté solaire deviendra nubileuse,
Ronger le tout , grand peste venir d’elles.
IV, 49
Devant le peuple, sang sera respandu,
Que de haut ciel ne viendra esloigner:
Mais d’un long temps ne sera entendu,
L’esprit d’un seul le viendra tesmoigner.
IV,50
Libra verra regner les Hesperies,
De ciel & terre tenir la monarchie:
D’Asie forces nul ne verra paries,
Que sept ne tiennent par rang la hierarchie.