Centuria II, 51-60

II,51
Le sang de juste à Londres sera faulte,
Bruslés par fouldres de vingt trois les six:
La dame antique cherra de place haute,
Des mesme secte plusieurs seront occis.
II,52
Dans plusieurs nuits la terre tremblera:
Sur le printemps deux effors suite:
Corinthe, Ephese aux deux mers nagera,
Guerre s’esmeut par deux vaillans de luit.
II,53
La grande peste de cité maritime,
Ne cessera que mort ne soit vengée
Du juste sang par pris damné sans crime,
De la grand dame par feincte n’outraigée.
II,54
Par gent estrange, & Romains lointaine,
Leur grand cité apres eaue fort troublée:
Fille sans trop different domaine,
Prins chef, ferreure n’avoir este riblée.
II,55
Dans le conflict le grand qui peu valloit,
A son derrnier fera cas merveilleux:
Pendant qu’Hadrie verra ce qu’il falloit,
Dans le banquet pongnale l’orgueilleux.
II,56
Que peste & gLoire n’a sceu definer,
Mort dans le puis sommet du ciel frappé:
L’abbé mourra quand verra ruiner,
Ceux du naufrage l’escueil voulant grapper.
II,57
Avant conflict le grand tombera,
Le grand à mort, mort, trop subite & plainte,
Nay imparfaict: la plus part nagera,
Aupres du fleuve de sang la terre tainte.
II,58
Sans pied ne main dend aigue & forte,
Par globe au fort de port & lainé nay:
Pres du portail desloyal transporte,
Silene luit, petit grand emmené.
II,59
Classe Gauloise par appuy de grande garde,
Du grand Neptune, & ses tridens souldars:
Rongée Provence pour soustenir grande bande,
Plus Mars Narbon, par javelots & dards.
II,60
La foy Punicque en Orient rompue
Grand Jud. & Rosne,Loire & Tag changeront.
Quand du mulet la faim sera repue,
Classe espargie, sang & corps nageront.