Centuria IV, 71-80

IV,71
En lieu d’espouse les filles trucidees,
Meurtre à grand faulte ne sera superstile:
Dedans le puys vestules inondées,
L’espouse estraincte par hauste d’Aconite.
IV,72Les Artomiques par Agen & l’Estore,
A sainct Felix feront leur parlement:
Ceux de Basas viendront à la mal’heure,
Saisir Condon & Marsan promptement.
IV,73
Le nepeu grand par forces prouvera,
Le pache faict du coeur pusillanime:
Ferrare & Ast le Duc esprouvera,
Par lors qu’au soir sera le pantomime.
IV,74
Du lac liman & ceux de Brannonices,
Tous assemblez contre ceux d’Aquitaine
Germains beaucoup, encor plus Souisses,
Seront defaictz avec ceux d’Humaine.
IV,75
Prest à combatre fera defection.
Chef adversaire obtiendra la victoire.
L ‘arriere garde fera defension,
Les deffaillans mort au blanc territoire.
IV,76
Les Nictobriges par ceux de Perigort,
Seront vexez tenant jusques au Rosne:
L’associé de Gascons & Begorne,
Trahir le temple, le prebstre estant au prosne.
IV,77
SELIN monarque l’Italie pacifique,
Regnes unis Roi chrestien du monde:
Mourrant voudra coucher en terre blesique
Apres pirates avoir chassé de l’onde.
IV,78
La grand armee de la pugne civile,
Pour de nuict Parme à l’estrange trouvée,
Septante neuf meurtris dedans la ville,
Les estrangiers passez tous à l’espee.
IV,79
Sang Royal fuis, Monhurt,Mas, Eguillon,
Remplis seront de Bourdelois les landes,
Navarre, Bigorre poinctes & eguillons,
Profondz de faim vorer de liege glandes.
IV,80
Pres du grand fleuve, grand fosse, terre egeste,
En quinze pars sera l’eau divisee:
La cité prinse, feu, sang, cris conflict mettre
Et la plus part concerne au collisee.