Centuria III, 91-100

III,91
L’arbre qu’estoit par long temps mort seché,
Dans une nuict viendra à reverdir:
Cron Roy malade, Prince pied estaché,
Criant d’ennemis fera voile bondir.
III,92
Le monde proche du dernier periode,
Saturne encor tard sera de retour:
Translat empire devers nation Brodde,
L’oeil arraché à Narbon par Autour.
III,93
Dans Avignon tout le chef de l’empire
Fera arrest pour Paris desolé:
Tricast tiendra l’Annibalique ire,
Lyon par change sera mal consolé.
III,94
De cinq cens ans plus compte l’on tiendra
Celui qu’estoit l’adornement de son temps:
Puis à un coup grand clarté donra,
Que par ce siecle les rendra tres contens.
III,95
La loy Moricque on verra defaillir,
Apres un autre beaucoup plus seductive:
Boristhenes premier viendra faillir,
Par dons & langue une plus attractive.
III,96
Chef de Fossan aura gorge coupee,
Par le ducteur du limier & leurier:
La faict patré par ceux de mont Tarpee,
Saturne en Leo 13 de Fevrier.
III,97
Nouvelle loi terre neufue occuper,
Vers la Syrie, Judee & Palestine:
Le grand empire barbare corruer,
Avant que Phoebus son siecle determine.
III,98
Deux royals freres si fort guerroierent,
Qu’entre eux sera la guerre si mortelle:
Qu’un chacun places fortes occuperont,
De regne & vie sera leur grand querelle.
III,99
Aux champs herbeux d’Alein et du Varneigne,
Du mont Lebron proche de la Durance,
Camps de deux parts conflict sera si aigre
Mespotamie defaillira en la France.
III,100
Entre Gaulois le dernier honnoré,
D’homme ennemi sera victorieux:
Force & terroir en moment exploré
D’un coup de traict quand mourra l’envieux.