Centuria III, 51-60

III,51
Paris conjure un grand meurtre commettre,
Blois le fera sortir en plain effect:
Ceux d’Orleans voudront leur chef remettre,
Angiers, Troye, Langres leur feront un meffait.
III,52
En la campaigne sera si longue pluie,
Et en la Pouille si grand siccité:
Coq verra l’Aigle, l’aesle mal accompli
Par Lyon mise sera en extremité.
III,53
Quand le plus grand emportera le pris,
De Nuremberg, d’Auspourg & ceux de Basle
Par Agrippine chef Frankfort repris:
Traverseront par Flammant jusqu’en Gale.
III,54
L’un des plus grands fuira aux Espaignes
Qu’en longue playe apres viendra saigner:
Passant copies par les hautes montaignes,
Devastant tout & puis en paix regner.
III,55
En l’an qu’un oeil en France regnera,
La court sera à un bien facheux trouble:
Le grand de Blois son ami tuera,
Le regne mis en mal & doubte double.
III,56
Montauban, Nismes,Avignon & Besier,
Peste tonnere & gresle à fin de Mars:
De Paris pont, Lyon mur, Montpellier,
Depuis six cens & sept vingts trois pars.
III,57
Sept fois, changer verrez gent Britannique
Taintz en sang en deux cents nonante an:
Franche non point par appuy Germanique,
Aries doubte son pole Bastarnien.
III,58
Aupres du Rhin des Montaignes Noriques,
Naistra un grand de gens trop tard venu.
Qui defendra Saurome & Pannoniques,
Qu’on ne sçaura qu’il sera devenu.
III,59
Barbare empire par le tiers usurpé,
La plus grand part de son sang mettra à mort:
Par mort senile par lui le quart frappé,
Pour peur que la sang par le sang ne soi mort.
III,60
Par toute Asie grand proscription,
Mesme en Mysie, Lysie, & Pamphylie:
Sang versera par absolution,
D’un jeune noir rempli de felonnie.