Centuria III, 61-70

III,61
La grand band & secte crucigere,
Se dressera en Mesopotamie:
Du proche fleuve compaigne legiere,
Que telle tiendra pour ennemie.
III,62
Proche del duero par mer Cyrrene close,
Viendra percer les grands monts Pyrenées:
La main plus courte & sa percee gloze,
A Carcassonne conduira ses menées.
III,63
Romain pouvoir sera du tout abas,
Son grand voisin imiter les vestiges:
Occultes haines civiles & debats,
Retarderont aux bouffons leurs folies.
III,64
Le chef de Perse remplira grande Ochlade,
Classe Frireme contre gent Mahometique:
De Parthe & Mede & pillere les Cyclades,
Repos long temps aux grand port Ionique.
III,65
Quand le sepulcre du grand Romain trouvé,
Le jour apres sera esleu Pontife:
Du Senat gueres il ne sera prouvé,
Empoisonné son sang au sacré scyphe.
III,66
Le grand Baillif d’Orleans mis à mort,
Sera par un de sang vindicatif.
De mort merite ne mourra, ne par sort,
Des pieds & mains mal le faisoit captif.
III,67
Une novelle secte de Philosophes,
Mesprisant mort, or, honneurs & richesses:
Des monts Germains ne seront limitrophes,
A les ensuivre auront appuy & presses.
III,68
Peuple sans chef d’Espaigne & d’Italie,
Morts, profligez dedans le Cherronesse:
Leur dict trahi par legiere folie,
Le sang nager par tout à la traverse.
III,69
Grand excercite conduict par jouvenceau,
Se viendra rendre aux mains des ennemis:
Mais le viellard nay au demi porceau,
Fera Chalon & Mascon estre amis.
III,70
La grande Bretagne comprinse l’Angleterre,
Viendra par eaux si haut à inonder
La ligue neufue d’Ausone fera guerre,
Que contre eux ils se viendront bander.