Centuria IV, 11-20

IV,11
Celui qu’aura gouvert de la grand cappe,
Sera induict à quelques cas patrer
Les douze rouges viendront fouiller la nappe.
Soubz meutre, meutre se viendra perpetrer.
IV,12
Le camp plus grand de route mis en fuite,
Guaires plus outre ne sera pourchassé:
Ost recampé, & legion reduicte,
Puis hors ses Gaules du tout sera chassé.
IV,13
De plus grand perte nouvelles raportées,
Le raport fait le camp s’estonnera:
Bandes unies encontre revoltées,
Double phalange grand abandonnera.
IV,14
La mort subite du premier personnage.
Aura changé & mis un autre au regne:
Tost, tard venu à si haut & bas aage,
Que terre & mer faudra que on le craigne.
IV,15
D’où pensera faire venir famine,
De là viendra le rassasiement:
L’oeil de la mer par avare canine
Pour de l’un l’autre donra buile,
froment.
IV,16
La cité franche de liberté fait serve,
Des profligés & resveurs faict asile:
Le Roy changé à eux non si proterve
De cent seront devenus plus de mille.
IV,17
Changer à Beaune, Nuy, Chalons & Dijon,
Le duc voulant amander la Barrée
Marchant pres fleuve, poisson, bec de plongeon,
Vers la queue; porte sera serrée.
IV,18
Des plus lettrés dessus les faicts celestes
Seront par princes ignorans reprouvés:
Punis d’Edit, chassez comme scelestes,
Et mis à mort là où seront trouvés.
IV,19
Devant Rouen d’Insubres mis le siege,
Par terre & mer enfermés les passages:
D’Haynault, & Flandres, de Gand & ceux de Liege,
Par dons laenées raviront les rivages.
IV,20
Paix uberté long temps lieu louera;
Par tout son regne desert la fleur de lis:
Corps morts d’eau, terre là lon apportera,
Sperants vain heur d’estre là ensevelis.