Centuria II, 81-90

II,81
Par feu du ciel la cité presque aduste,
L’urne menace encor Ceucalion,
Vexée Sardaigne par la Punique fuste,
Apres que Libra lairra son Phaëton.
II,82
Par faim la proye fera loup prisonnier,
L’assaillant lors en extreme detresse,
Le nay ayant au devant le dernier,
Le grand n’eschappe au milieu de la presse.
II,83
Le gros traffic d’un grand Lyon changé
La plus part tourne en pristine ruine.
Proie aux soldats par pille vendengé
Par Jura mont & Sueve bruine.
II,84
Entre Campaigne, Sienne, Flora, Tustie,
Six mois neuf jours ne ploura une goutte:
L’estrange langue en terre Dalmatie,
Courira sus: vastant la terre toute.
II,85
Le vieux plain barbe soubs le statut severe,
A Lyon faict dessus l’Aigle Celtique:
Le petit grand trop autre persevere,
Bruit dárme au ciel: mer rouge Ligustique.
II,86
Naufrage à classe pres d’onde Hadriatique,
La terre tremble esmeüe sus l’air en terre mis:
Egypte tremble augment Mahometique,
L’Herault soi rendre à crier est commis.
II,87
Apres viendra des extremes contrées
Prince Germain, dessus le throsne doré:
La servitude & eaux rencontrées,
La dame serve, son temps plus n’adore.
II,88
Le circuit du grand faict ruineux,
Le nom septiesme du cinquiesme sera:
D’un tiers plus grand l’estrange belliqueux,
Mouton, Lutece, Aix ne garantira.
II,89
Un jour seront demis les deux grands maistres,
Leur grand pouvoir se verra augmenté:
La terre neufue sera en ses hauts estres,
Au sanguinaire le nombre racompté.
II,90
Par vie & mort changé regne d’Ongrie,
La loi sera plus aspre que service:
Leur grand cité d’hurlements plaincts & crie,
Castor & Pollux ennemis dans la lice.