Centuria V, 71-80

V,71
Par la fureur d’un qui attendra l’eau,
Par la grand raige tout l’exercite esmeu:
Chargé des nobles à dix sept bateaulx,
Au long du Rosne, tard messagier venu.
V,72
Pour le plaisir d’edict voluptueux,
On meslera la poison dans l’aloy:
Venus sera en cours si vertueux,
Qu’obfusquera du soleil tout à loi.
V,73
Persecutee sera de Dieu l’eglise,
Et les sainctz temples seront expoliez:
L’enfant la mere mettra nud en chemise,
Seront Arabes aux Polons raliez.
V,74
De sang Troyen naistra coeur Germanique
Qu’il deviendra en si haute puissance:
Hors chassera gent estrange Arabique
Tournant l’Eglise en pristine preeminence.
V,75
Montera haut sur le bien plus à dextre,
Demourra assis sur la pierre quarree:
Vers le midi posé à la fenestre,
Baston tortu en main, bouche serree.
V,76
En lieu libere tendra son pavillon,
Et ne voudra en citez prendre place:
Aix, Carpens l’isle volce, mont Cavallon,
Par tous ses lieux abolira sa trasse.
V,77
Tous les degrez d’honneur Ecclesiastique
Seront changez en dial quirinal.
En Martial quirinal flaminique,
Puis un Roi de France le rendre vulcanal.
V,78
Les deux unis ne tiendront longuement,
Et dans treize ans au Barbare Satrappe:
Au deux costez seront tel perdement,
Qu’un benira le Barque & sa cappe.
V,79
La sacree pompe viendra baisser les aisles,
Par la venue du grand legislateur:
Humble haulsera vexera les rebelles,
Naistra sur terre aucun aemulateur.
V,80
Logmion grande Bisance approchera,
Chasse sera le barbarique ligne:
Des deux loix l’une l’estinique lachera,
Barbare & franche en perpetuelle brigue.