Centuria IV, 1-10

IV,1
Cela du reste de sang non espandu,
Venise quiert secours estre donné,
Apres avoir bien long temps attendu,
Cité livrée au premier cornet sonné.
IV,2
Par mort la France prendra voyage à faire,
Classe par mer, marcher monts Pyrenées,
Espaigne en trouble, marcher gent militaire:
Des plus grand Dames en France emmenées.
IV,3
D’Arras & Bourges, de Brodes grans enseignes,
Un plus grand nombre de Gascons batre à pied,
Ceux long du Rosne saigneront les Espaignes:
Proche du mont ou Sagonte s’assied.
IV,4
L’impotent prince faché, plaincts & querelles,
De rapts & pillé, par coqz & par Libiques:
Grand est par terre par mer infinies voilles
Seule Italie sera chassant Celtiques.
IV,5
Croix, paix, soubz un accompts divin verbe,
L’Espaigne & Gaule seront unis ensemble:
Grand clade proche, & combat tresacerbe,
Coeur si hardi ne sera qui ne tremble.
IV,6
D’habits nouveaux apres faicte la treuve,
Malice tramme & machination:
Premier mourra qui en fera la preuve,
Couleur venise insidiation.
IV,7
Le mineur filz du grand & hai Prince,
De lepre aura à vingt ans grande tache,
De deuil sa mere mourra bien triste & mince,
Et il mourra là où tombe cher lache.
IV,8
La grand cité d’assaut prompt & repentin,
Surprins de nuict, gardes interrompus:
Les excubies & vielles sainct Quintin,
Trucidés gardes & les pourtails rompus.
IV,9
Le chef du camp au milieu de la presse,
D’un coup de fleche sera blessé aux cuisses,
Lors que Geneve en larmes & detresse,
Sera trahi par Lozan & Souisses.
IV,10
Le jeune prince accusé faulsement,
Mettra en trouble le camp & en querelles:
Meutri le chef pour le soustenement,
Sceptre appaiser: puis guerir escrouelles.