Centuria II, 31-40

II,31
En Campanie le Cassilin sera tant,
Qu’on ne verra que d’aux les champs coumers:
Devant apres le pluie de long temps,
Hors mis les arbres rien l’on verra de vert.
II,32
Laict, sant grenouilles escoudre en Dalmatie,
Conflict donné, peste pres de Balennes,
Cri sera grand par toute Esclavonie,
Lors naistra monstre pres & dedans Ravenne.
II,33
Par le torrent qui descent de Veronne,
Par lors qu’au Pau guidera son entrée:
Un grand naufrage, & non moins en Garonne
Quand ceux de Gennes marcheront leur contree.
II,34
L’ire insensee du combat furieux
Fera à table par freres le fer luire:
Les despartir, blessée, curieux,
Le fier duelle viendra en France nuire.
II,35
Dans deux logis de nuict le feu prendra,
Plusieurs dedans estouffes & rostis:
Pres de deux fleuves pour seul il aviendra:
Sol, l’Arq & Caper tous seront amortis.
II,36
Du grand Prophete les lettres seront prinses,
Entre les mains du tyran deviendront:
Frauder son Roy seront ses entreprinses,
Mais ses rapines bien tost le troubleront.
II,37
De ce grand nombre que l’on envoyera,
Pour secourir dans le fort assiegez,
Peste & famine tous les devorera,
Hors mis septante qui seront profligez.
II,38
Des condamnez sera fait un grand nombre,
Quand les monarques seront conciliez:
Mais l’un deux viendra si malencombre
Que gere ensemble ne seront reliez.
II,39
Un an devant le conflict Italique,
Germains, Gaulois, Hespaignols pour le fort:
Cherra l’escolle maison de republique,
Ou, hors mis peu, seront suffoque mors.
II,40
Un peu apres non point longue intervalle
Par mer & terre sera faict grand tumulte:
Beaucoup plus grande sera pugne navalle,
Feux, animaux, qui feront plus d’insulte.