Centuria IV, 91-100

IV,91
Au duc Gauloise contrainct battre au duelle,
La nef Mellele monech n’approchera,
Tort accusé, prison perpetuelle,
Son fils regner avant mort taschera.
IV,92
Teste tranchee du vaillant capitaine,
Sera getee devant son adversaire:
Son corps pendu de la classe à l’antenne,
Confus fuira par rames à vent contraire.
IV,93
Un serpent veu proche du lict royal;
Sera par dame nuict chiens n’abayeront:
Lors naistre en France un Prince tant royal,
Du ciel venu tous les Princes verront.
IV,94
Deux grands freres seront chassez d’Espaigne
L’aisné vaincu sous les monts Pyrenees:
Rougir mer, rosne, sang lemam d’Alemaigne,
Narbon, Blyterre, d’Agath contaminees.
IV,95
La regne à deux laissé bien peu tiendront.
Trois and sept mois passés feront la guerre.
Les deux vestales contre eux rebelleront,
Victor puis nay en Armorique terre.
IV,96
La soeur aisnée de l’isle Britannique,
Quinze ans devant le frere aura naissance:
Par son promis moyennant verrifique,
Succedera au regne de balance.
IV,97
L’an que Mercure, Mars, Venus retrograde,
Du grand Monarque la ligne ne faillit:
Esleu du peuple l’usitant pres de Gagdole,
Qu’en paix & regne viendra fort envieillir.
IV, 98
Les Albanois passeront dedans Rome,
Moyennant Langrés demipler affublés,
Marquis & Duc ne pardonnes à homme,
Feu,sang,morbilles,point d’eau, faillir les bleds.
IV,99
L’ainé vaillant de la fille du Roy,
Repousera si profond les Celtiques:
Qu’il mettra foudres, combien en tel arroi
Peu & loing puis profond és Hesperiques.
IV,100
De feu celeste au Royal edifice,
Quant la lumiere de Mars defaillira:
Sept mois grand guerre, mort gent de malefice,
Rouen, Eureux au Roi ne faillira.