Centuria IV, 81-90

IV,81
Pont on fera promptement de nacelles,
Passer l’armee du grand prince Belgique:
Dans profondres & non loing de Brucelles,
Outre passés, detrenchés sept à picque.
IV,82
Amas s’approche venant d’Esclavonie,
L’Olestant vieux cité ruinera:
Fort desolee verra sa Romanie.
Puis la grand flamme estaindre ne sçaura.
IV,83
Combat nocturne le vaillant capitaine,
Vaincu fuira peu de gens profligé:
Son peuple esmeu, sedition non vaine,
Son propre filz le tiendra assiegé.
IV,84
Un grand d’Auxerre mourra bien miserable,
Chassé de ceux qui soubs lui ont esté:
Serré de chaines , apres d’un rude cable,
En l’an que Mars, Venus, & Sol, mis en esté,
IV,85
Le charbon blanc du noir sera chassé,
Prisonnier faicte mené au tombereau:
More Channeau sus piedz entrelassez,
Lors le puisné sillera l’aubereau.
IV,86
L’an que Saturne en eau sera conjoinct.
Avecques Sol, le Roi fort & puissant:
A Reims & Aix sera reçeu & oingt,
Apres conquestes meutrira innocens.
IV,87
Un filz du Roi tant de langues aprins,
A son aisné au regne different :
Son pere beau au plus grand filz comprins
Fera perir principal adherent.
IV,88
Le grand Antoine au nom de faicte sordide
De Phthiriase à son dernier rongé:
Un qui de plomb voudra estre cupide,
Passant le port d’esleu sera plongé.
IV,89
Trente de Londres secret conjureront,
Contre leur Roi sur le pont entreprinse,
Lui, satalites la mort degousteront.
Un roi esleu blonde, natif de Frize.
IV,90
Les deux copies aux murs ne pourront joindre.
Dans cest instant trembler Milan, Ticin:
Faim, soif doubtance si fort les viendra poindre,
Chair, pain, ne vivres n’auront un seul boucin.