Prophecies by Nostradamus, ipsis litteris

Search

Results

sábado, 17 de maio de 2008

Centuria VI, 11-20

VI,11
Des sept rameaux à trois seront reduicts,
Les plus aisnez seront surprins par mort,
Fraticider les deux seront seduicts,
Les conjurez en dormans seront mors.
VI,12
Dresser copies pour monter à l’Empire
Du Vatican le sang Royal tiendra:
Flamans, Anglois, Espaigne avec Aspire,
Contre l’Italie & France contendra.
VI,13
Un dubieux ne viendra loing du regne,
La plus grand part le voudra soustenir:
Un Capitole ne voudra point qu’il regne,
Sa grande charge ne pourra maintenir.
VI,14
Loing de sa terre Roy perdra la bataille,
Prompt eschappé poursuivi suivant prins,
Ignare prins soubs la doree maille.
Soubs fainct habit & l’ennemy surprins.
VI,15
Dessoubs la tombe sera trouvé le Prince,
Qu’aura le pris par dessus Nuremberg:
L’Espaignol Roi en Capricorne mince,
Fainct & trahi par le grand Uvitemberg.
VI,16
Ce qui ravi sera du jeune Milve,
Par les Normans de France & Picardie:
Les noirs du temple du lieu de Negrisilve
Feront aulberge & feu de Lombardie.
VI,17
Apres les lismes brusler les asniers,
Contraints seront changer habits divers:
Les Saturnins bruslez par les meusniers,
Hors la plupart qui ne sera convers.
VI,18
Par les phisiques le grand Roy delaissé,
Par sort non art de l’Ebrieu est en vie,
Lui & son genre au regne hault poussé.
Grace donnee à gent qui Christ envie.
VI,19
La vraie flamme engloutira la dame,
Que voudra mettre les Innocens à feu:
Pres de l’assaut l’exercite s’enflamme,
Quant dans Seville monstre en boeuf sera veu.
VI,20
L’union faincte sera peu de duree,
Des uns changés reformés la pluspart:
Dans les vaissaux sera gent endurée,
Lors aura Rome un nouveau liepart.

Nenhum comentário: