Centuria I, 16-20

I,16
Faulx à l’estang joint vers le Sagitaire,
En son hault AUGE de l’exaltation,
Peste, famine, mort de main militaire,
La siecle approche de renouvation.
I,17
Par quarante ans l’Iris n’apparoistra,
Par quarante ans tous les jours sera veu:
La terre aride en siccité croistra,
Et grans deluges quand sera aperceu.
I,18
Par la discorde negligence Gauloise,
Sera passaige à Mahommet ouvert:
De sang trempé la terre & mer Senoise,
Le port phocen de voiles & nefs convert.
I,19
Lors que serpens viendront circuir l’are,
Le sang Troyen vexé par les Espaignes:
Par eux grand nombre en sera faicte tare.
Chef fruict, caché aux mares dans les saignes.
I,20
Tours, Orleans, Blois, Angiers, Reims, & Nantes,
Cités vexées par subit changement:
Par langues estranges seront tendues tentes,
Fleuves, dards Rones, terre & mer tremblement.

Centuria I, 11-15

I,11
Le mouvement de sens, coeur, pieds et mains,
Seront d’accord Naples, Lyon, Sicille.
Glaves, feux, eaux puis aux nobles Romains,
Plongez tuez mors par cerveau debile.
I,12
Dans peu dira faulce brute fragile,
De bas en haut eslue promptement:
Puis un instant desloyale et labile
Qui de Veronne aura governement.
I,13
Les exilez par ire, haine intestine,
Feront au Roy grand conjuration:
Secret mettront ennemis par la mine,
Et ses vieux siens contre aux sedition.
I,14
De gent esclave chansons, chants & requestes,
Captifs par Princes & Seigneur aux prisons.
A l’avenir par idiots sans testes,
Seront reçus par divines oraisons.
I,15
Mars nous menace par la force bellique,
Septante fois fera le sang espandre:
Auge & ruine de l’Ecclesiastique,
Et plus ceux qui d’eux rien voudront entendre.