Centuria VI, 51-60

VI,51
Peuple assemblé, voir nouveau expectacle,
Princes & Rois par plusieurs assistans:
Pilliers faillir, murs, mais comme miracle
Le Roi sauvé & trente des instants.
VI,52
En lieu du grand qui sera condemné,
De prison hors son ami en sa place:
L’espoir Troien en six mois joinct, mort nay,
Le Sol à l’urne seront prins fleuves en glace.
VI,53
Le grand Prelat Celtique à Roi suspect,
De nuict par cours sortira hors du regne:
Par duc fertile à son grand Roi, Bretaigne,
Bisance à Cipres & Tunes insuspect.
VI,54
Au poinct du jour au second chant du coq,
Ceulx de Tunes, de Fez, & de Bugie,
Par les Arabes captif le Roi Maroq,
L’an mil six cens & sept, de Liturgie.
VI,55
Au chlamé Duc, en arrachant l’esponce,
Voile Arabesque voir, subit descouverte:
Tripolis Chio, & ceux de Trapesonce,
Duc prins, Marnegro & la cité deserte.
VI,56
La crainte armee de l’ennemi Narbon,
Effrayera si fort les Hesperiques;
Parpignan vuide par l’aveugle darbon,
Lors Barcelon par mer donra les piques.
VI,57
Celui qu’estoit bien avant dans le regne,
Ayant chef rouge proche à la hierarchie:
Aspre & cruel, & se fera tant craindre,
Succedera à sacré monarchie.
VI,58
Entre les deux monarques esloinguez,
Lors que Sol par Selin clair perdue:
Simulté grande entre deux indignez,
Qu’aux Isles & Sienne la liberté rendue.
VI,59
Dame en fureur par rage d’adultere,
Viendra à son Prince conjurer non de dire:
Mais bref cogneu sera le vitupere,
Que seront mis dix sept à martyre.
VI,60
Le Prince hors de son terroir Celtique
Sera trahi, deceu par l’interprete:
Rouan, Rochelle par ceux de l’Armorique
Au port de Blaue deceus par moine & prebstre.