Centuria VI, 41-50

VI,41
Le second chef de regne d’Annemarc,
Par Ceux de Frise & l’isle Brittanique,
Fera despendre plus de cent mille marc,
Vain exploicter voyage en Italique.
VI,42
A lomygon sera laissé le regne,
Du grand Selin qui plus fera de faict:
Par les Italies estiendra son enseigne,
Regi sera par prudent contrefaict.
VI,43
Long temps sera sans estre habitée,
Ou Signe & Marne autour vient arrouser:
De la Tamise & martiaux tentée,
Decevez les gardes en cuidant repouser.
VI,44
De nuicts par Nantes L’Iris apparoistra,
Des artz marins susciteront la pluie:
Arabique goulfre grand classe parfondra,
Un monstre en Saxe naistra d’ours & truie.
VI,45
Le gouverneur du regne bien scavant,
Ne consentir voulant au faict Royal:
Mellile classe par le contraire vent,
Le remettra à son plus desloyal.
VI,46
Un juste sera en exile renvoyé,
Par pestilence aux confins de Nonseggle,
Response au rouge le fera destroyé,
Roi retirant à la Rane & à l’aigle.
VI,47
Entre deux monts les deux grans assemblés
Delaisseront leur simulté secrette:
Brucelle & Dolle par Langres acablés,
Pour à Malignes executer leur peste.
VI,48
La saincteté trop faincte & seductive,
Accompaigné d’une langue diserte:
La cité vieille & Parme trop hastive,
Florence & Sienne rendront plus desertes.
VI,49
De la partie de Mammer grand Pontife,
Subjugera les confins du Danube:
Chasser les croix par fer raffe ne riffe,
Capitfz, or, bagues plus de cent mille rubes.
VI,50
Dedans le puys seront trouvés les oz.
Sera l’incest conmis par la maratre:
L’estat changé on querra bruict & loz,
Et aura Mars attendant pour son astre.