Centuria X, 91-99

X,91
Clergé Romain l’an mil six cens & neuf,
Au chef de l’an feras election
D’un gris & noir de la Compagne
Qui onc ne feut si maling
X,92
Devant le pere l’enfant sera tué
Le pere apres entre cordes de jonc
Genevois peuple sera esvertué
Gisant le chief au milieu comme un tronc.
X,93
La barque neufve recevra les voyages
Là & aupres transferont l’empire
Beaucaire, Arles retiendront les hostages
Pres deux colomnes trouvees de porphire.
X,94
De Nismes, d’Arles, & Vienne contemner
N’obei tant à l’edict Hespericque
Aux labourez pour le grand condamner
Six eschappez en habit seraphicque
X,95
Dans les Espaignes viendra Roi trespuissant
Par mer & terre subjugant or midi;
Ce mal fera rabaissant le croissant
Baisser les aesles à ceux du vendredi.
X,96
Religion du nom des mers vaincra ,
Contre le secte fils Adaluncatif,
Secte obstinee deploree craindra
Des deux blessez par Aleph & Aleph
X,97
Trirremes pleines tout aage captif,
Temps bon à mal, le doux pour amertume
Proie à Barbares trop seront hastifs,
Cupid de veoir plaindre au vent la plume
X,98
La esplendeur claire à pucelle joyeuse,
Ne luira plus long temps sera sans sel:
Avec marchans, ruffiens loups odieuse,
Tous pesle mesle monstre universel.
X,99
La fin le loup, le lyon, beuf, & l’asne,
Timide dama seront avec mastins,
Plus ne cherra à eux la douce manne,
Plus vigilance & custode aux mastins.

Centuria I, 26-30

I,26
Le grand du fouldre tumbe d’heure diurne,
Mal & predict par porteur postulaire:
Suivant presage tumbe d’heure nocturne,
Conflict Reims, Londres, Etrusque pestifere.
I,27
Dessouz de chaine Guien du ciel frappé,
Non loing de là est caché le tresor:
Qui par longs siecles avoit esté grappé,
Trouve mourra, l’oeil crevé de ressort:
I,28
La tour de Boucq craindra fuste barbare
Un temps, long temps apres barque hesperique.
Bestail, gens, meubles tous deux feront grand tare
Taurus & Libra quelle mortelle picque?
I,29
Quand le poisson terrestre & aquatique
Par force vague au gravier sera mis,
Sa forme estrange suave & horrifique,
Par mer aux murs bien tost les ennemis.
I,30
La nef estrange par le tourment marin,
Abordera pres de port incogneu;
Nonobstant signes de rameau palmerin,
Apres mort pille bon advis tarde venu.