Centuria VI, 31-40

VI,31
Roi trouvera ce qu’il desiroit tant,
Quand le Prelat sera reprins à tort.
Responce au duc le rendra mal content,
Qui dans Milan mettra plusieurs a mort.
VI,32
Par trahison de verges à mort battu,
Prins surmonté sera par son desordre:
Conseil frivole au grand captif sentu,
Nez par fureur quant Berich viendra mordre.
VI,33 pg.320
Sa main derniere par Alus sanguinaire
Ne se pourra par la mer guarentir:
Entre deux fleuves craindre main militaire,
Le noir l’ireux le fera repentir.
VI,34
Du feu volant la machination,
Viendra troubler au grand chef assiegez:
Dedans sera telle sedition,
Qu’en desespoir seront les profligez.
VI,35
Pres de Rion & proche à la blanche laine,
Aries, Taurus, Cancer, Leo, la Vierge,
Mars , Jupiter, le Sol ardra grand plaine
Bois & citez, lettres cachez au cierge.
VI,36
Ne bien ne mal par bataille terrestre,
Ne parviendra aux confins de Perousse:
Rebeller Pise, Florence voir mal estre,
Roi nuict blessé sur mulet à noire house.
VI,37
L’oeuvre ancienne se parachevera,
Du toict cherra sur le grand mal ruine:
Innocent faict mort on accusera:
Nocent caiché taillis à la bruine.
VI,38
Au profligez de paix les ennemis,
Apres avoir l’Italie superee:
Noir sanguinaire, rouge sera commis,
Feu,sang verser, eaue de sang couloree.
VI,39
L’enfant du regne par paternelle prinse,
Expolié sera pour delivrer:
Apres du lac Trasimen l’azur prinse,
La troupe hostaige por trop fort s’enivrer.
VI,40
Grand du Magonce pour grand soif estaindre,
Sera privé de sa grand dignité:
Ceux de Cologne si fort le viendront plaindre,
Que le grand groppe au Rin sera getté.

Centuria II, 61-70

II,61
Euge, Tamins, Gironde & la Rochele,
O sang Troyen Mort au port de la flesche:
Derrier le fleuve au fort mise l’eschele,
Pointe feu grand meutre sus la bresche.
II,62 pg. 122
Mabus puis tost alors mourra,viendra,
De gens & bestes une horrible defaite:
Puis tout à coup la vengeance on verra,
Cent, main, soif, faim, quand courra la comete.
II,63
Gaulois, Ausone bien peu subiugera,
Par, Marne & Seine fera Perme l’ivrie:
Qui le grand mur contre eux dressera,
Du moindre au mar le grand perdra la vie.
II,64
Seicher de faim, de soif, gent Genevoise,
Espoir prochain viendra au defaillir:
Sur point tremblant sera loi Gebennoise.
Classe au grand port ne se peut acuillir.
II,65
Le parc enclin grande calamité.
Par l’Hesperie & Insubre fera:
Le feu en nef peste et captivité,
Mercure en l’Arc Saturne fenera.
II,66
Par grans dangiers le captif eschapé,
Peu de temps grand a fortune changée:
Dans le palais le peuple est attrapé,
Par bon augure la cité assiegée.
II,67
Le blond au nez forchu viendra commettre,
Par le duelle & chassera dehors:
Les exiléz dedans fera remettre,
Aux lieux marins commettant les plus fors.
II,68
De l’aquillon les effor seront grands.
Sus l’Ocean sera la porte ouverte:
Le regne en l’isle sera reintegrand,
Tremblera Londres par voille descouverte.
II,69
Le Roy Gaulois par la Celtique dextre,
Voyant discorde de la grande Monarchie
Sur les trois pars fera florir son sceptre
Contre la Cappe de la grand Hierarchie.
II,70
Le dard du ciel fera son estendue,
Mors en parlant: grande execution:
La pierre en l’arbre la fiere gent rendue,
Bruit humain monstre purge expiation.